標題:
賴恩巴布當「兵」？
[打印本頁]
作者:
philipsl
時間:
2010-1-25 06:55 PM
標題:
賴恩巴布當「兵」？
【商台互動體育組】球壇包公：人善人欺天不欺，世間還有包青天，我球壇包公會負起替天行道的責任，為球壇的重要大事以至雞毛小事主持公道，不偏不倚，上至國際足協，下至球場草皮都難逃法眼，球迷放心：
傳紅軍兜搭雲格要「水貨」
呢排有關「紅軍水貨」賴恩巴布既轉會消息靜咗落嚟，之前話新特蘭同埋「香港製造」既伯明翰都可能會要呢個利物浦既荷蘭中、前場球員，甚至講到「阿伯」肯畀過千萬鎊買佢，之不過都係嗰句，得個講字。
不過有傳話賴恩巴布嫌「黑貓」同「阿伯」唔夠班所以唔肯轉會，如果真係咁樣，包公就真係覺得呢件「紅軍水貨」真係自大咗啲囉，你估自己真係咁勁咩，有人肯要真係掩住半邊咀笑啦。
嗰頭話呢件「紅軍水貨」自己屌高嚟賣，轉頭英國嗰邊有行家就話賴恩巴布可能會去阿仙奴！唔係啩？「教授」雲格對年青人情有獨鍾啫，但大前提係有潛質，點睇賴恩巴布都唔似係雲格「嗰杯茶」啦，而且仲傳話「教授」唔會肯攞1,100萬鎊買佢，可能用人加錢嚟換，邊個？咪就係今季爆咗出嚟、夏天就約滿既法蘭梅里達。如果真係咁既話，呢單轉會可能會成為「教授」執教生涯以嚟最大既污點嘞！
再見！「雲佬」
星期日喺皇家馬德里主場班拿貝球場，佢哋憑住基斯坦奴朗拿度(C朗拿度)梅開二度贏咗馬拉加，不過同時亦都上演咗一幕感人既場面，荷蘭前鋒雲尼斯達萊落實咗去德甲既漢堡，而禽晚就喺在場超過7萬名球迷既掌聲雷動同埋不絕既歡呼聲下，「雲佬」著住皮褸牛仔褲最後一次企喺球場，接受皇馬球迷對佢最後既祝福同埋感謝佢過去一直為「銀河艦隊」既努力，而「雲佬」既前曼聯隊友C朗拿度就以兩個入球做禮物送別佢離開，可以話係happy ending。
「大象」出局杜奧巴返得倫敦
科特迪瓦喺非國盃8強爆冷畀阿爾及利亞擊敗之後，「大象」行人止步，對球員同埋國民嚟講梗係唔開心，不過兩位車路士球星杜奧巴同埋沙洛文卡勞可能喺唔開心之餘都覺得未尚唔係好事，話晒之前多哥國家隊既旅遊巴被襲搞到3個無辜者喪生之後，有傳話杜奧巴成為咗槍手下一個目標，家陣科特迪瓦出局，佢一個齊齊飛返倫敦離開危險之地，講真，踢波啫人身安全要緊，何況佢哋對阿爾及利亞嗰陣都唔係「揸流灘」，好似卡勞咁就為「大象」先開紀錄，之後仲有基達幫球隊再次取得領先，最衰係完場前一刻畀阿爾及利亞既保基拉扳平，然後再喺加時輸埋，咁先至結束今次既非國盃之行，所以就算「大象」出咗局都冇乜人嘈佢哋，又或者罵佢哋貪生怕死。
歡迎光臨 娛樂滿紛 26FUN (http://26fun.com/bbs7/)
Powered by Discuz! 7.0.0
