attaboy

Originally posted by siredes at 2005-10-14 02:14 AM:
阿at你最近好少"交稿"喎, 吊晒我o地胃口呀...:cool:

吊人癮啲咁缺德既嘢，我係好少做既．之不過而家係我三十年以嚟最忙既時候．盡人事啦，重有好長篇幅先完結，希忙盡量抽空完成．

attaboy

......續前

過咗個禮拜，有日放工行到屋企樓下，突然間電話响，Melody called 我．佢問我喺邊，我話差唔多到屋企啦，佢話咁冇嘢．嘻，雖然當年我都重未係好明啲女仔諗乜嘢，但係聽佢咁講一定有事，同佢講：喺咪有事呀？佢答：你可唔可以出出嚟？我話：可以......咁你而家喺邊呢？佢話喺金鐘 PP 廣場，咁我就即飛的去同佢會合．一見到佢，個樣幾 down，我知又係同男友出問題，先同佢講：食咗嘢未？未！咁食先至講．跟住同佢喺麥當當一人食個不瘦降餐．食緊既時候，佢電話响，見佢拿住個電話唔出聲，一路聽對方講，但佢個表情就好呆滯．五分鐘......十分鐘......十五分鐘過咗，Melody 都係保持同一姿勢，亦都冇乜點出聲，只係間唔中哦，係咩，唔係囉咁回應，我唔駛估都知對頭電話係佢 bf 嚟，因為除咗我哋偉大祖國啲官僚會咁應電話外，普天之下就只一對拖友會咁樣對話．見 Melody 都好似重有排依依哦哦，我同佢打個眼色去洗手間，去完返嚟，見佢講完嘞．問佢咩事，佢吞吞吐吐，我話咁唔好講住，行陣場場先，兩個人就一路喺個全港數一數二大既 Shopping Mall 度做巡場．行咗一陣，佢開始入正題嘞，佢話好唔開心，我問佢點解，佢話因為佢男友話要殺佢！　　吓！唔係呱......如果要殺都係 Melody 買兇殺佢 bf 符會刻情架喎，點解倒翻轉，對人唔住嗰個可以咁大聲話要殺人呢？問佢乜事，佢話因為佢 bf （辜且畀個名佢叫阿神啦，神神化化個神）成日頭痛，以前阿神一頭痛，Melody 會好似 MTR 咁，話咁快就去睇佢，但係因為之前發生既事，令到 Melody 唔係好想見佢，前一晚阿神又打電話畀 Melody 話頭痛，但係 Melody 話唔得閒去睇佢，咁阿神就好似佢個名咁大發神經，喺咁鬧 Melody 唔理佢，兼且話要殺死佢．Oh! 呢個時候我知世間上原來重有人黐綫過區區在下，咁既事都做得出？阿神係咪男人嚟呢？我心裏問．雖則我發起神經嚟都同佢不相上下，但係我發作親都係有充份理據支持既，但係呢一次，我諗問十個人，不論男好女好，都會覺得我係冇幫阿神安錯名既．再問 Melody 喺咪好驚自身安全呢？佢話唔係，之但係覺得個心好實，好 hurt，因為阿神從來未對佢講過咁既說話．唉！咁我都冇計架，叫 Melody 放棄抽身佢又話唔得，咁兩個（應該係三個）人係都要糾纏不清，累鬥累，我作為局外人可以做既幾乎係零．唯有好言安慰 Melody，叫佢唔好咁唔開心，等阿神冷靜落嚟，就會冇事．同 Melody 行到 PP 廣場柵閘，佢都好似唔想返屋企，咁唯有繼續陪住佢啦，唔係佢如果真係睇唔開做咗傻事（見得太多女仔一為情唔開心，就會做啲比我癲起上嚟更難預計既嘢嘞），咁我一世都會唔安樂，唔係因為我鍾意 Melody，而係自細中咗古龍毒，佢筆下既小說主角永遠都唔會見死不救（even 係敵人）既，重通常會講（大概）：我救你只因為你係一個人，係人就有生存既權利．我係幾 buy 龍哥呢個對做人邏輯既．所以繼續留喺 Melody 身邊......（當晚未完，待續）

attaboy

......前篇重新整理發表

過左個禮拜，有日放工行到屋企樓下，突然間電話響，Melody called 我．佢問我o係邊，我話差唔多到屋企啦，佢話咁冇野啦．He he，雖然當年我都重未完全明白o的女仔諗乜野，但係聽佢咁講，一定有事啦，問佢：係咪有事呀？佢答：你可唔可以出出黎？我話：可以......咁你而家o係邊？佢話o係金鐘 PP 廣場，咁我就即刻飛的去同佢會合．見到佢，個樣 down down 地，唔駛問又係男友問題，先同佢講：食左野未？未！咁食o的野先．跟住同佢o係麥當當一人一個不瘦降餐．食緊既時候，佢電話響，見佢拿住個電話唔出聲，一路聽，一路個表情都好呆滯．五分鐘十分鐘十五分鐘過左，Melody 都係保持同一姿勢，亦都冇乜點出聲，只係間唔中「哦」，「係咩」，「唔係囉」咁回應，唔駛問都知對頭係佢 bf，因為除左我地偉大祖國o的為人民服務既官員會咁應電話外，普天之下就只有一對拖友會咁樣對話．見 Melody 都好似重有排依依哦哦，我同佢打個眼色示意去洗手間，去完返黎，傾完勒．問佢咩事，佢欲言又止，我話咁唔好講住，行陣商場先，兩個人就o係全港數一數二大既 Shopping Mall 度做巡場．

行o左一陣，佢開始入正題，話好唔開心，我問佢點解，佢話因為佢男友要殺佢！　　o下！唔係呱......咁反高潮？照劇情應該係 Melody 買兇殺佢 bf 先正路喎，點解倒翻轉，對人唔住O個個可以咁聲大大話要殺人呢？問佢乜事，佢話因為佢 bf （辜且畀個名佢叫阿神啦，神神化化個神）成日頭痛既，以前阿神一頭痛，Melody 就會好似 MTR 咁，話咁快就去睇佢，但係之前發生O左咁多事，令到 Melody 唔係好想見佢，前一晚阿神又打電話畀 Melody （我諗：詐）話頭痛，但係 Melody 呢次冇以前咁順擹，唔去睇佢．咁阿神就應O左佢個名，大發神經，係咁鬧 Melody 唔理佢，兼且話要殺死佢．Oops! 呢個時候我先知世間上原來重有人黐線過區區在下（吾道不孤矣），咁既事都做得出？阿神係咪男人黎呢......我心裏問．雖則我發起神經黎都唔輸蝕過佢，但係我發作親都係有充份理據支持既（至少我自己搵到 reasons support 啦）．但係呢一次，我諗問十個人，隨便男好女好，都會認同我係冇幫阿神安錯名既．再問 Melody 係咪好驚自身安全？佢話又唔係，之但係覺得個心拿住拿住，好唔開心，佢重話阿神從來未講過O的咁既說話．唉！咁我都冇計架，叫 Melody 放手抽身佢又唔制，咁兩個加一個係都要糾纏不清，累鬥累，我作為局外人可以做既幾乎係零．唯有好言安慰 Melody，叫佢唔好咁唔開心，等阿神冷靜落黎，就會冇事．

同 Melody 行到 PP 廣場柵閘，佢都好似唔想返屋企，咁唯有繼續陪住佢啦，唔係如果佢真係睇唔開做傻事（見得太多女仔一為情唔開心，就會比我更癲），咁我一世都會唔安樂，唔係因為我鍾意 Melody，而係自細中古龍毒中得太深，佢筆下既主角永遠都唔會見死不救（even 係敵人），重會大條道理話：我救你只因為你係一個人，係人就有生存既權利．　　　Hm......我不嬲都係幾 buy 龍哥呢個做人態度既．所以繼續留O係 Melody 身邊．但係夜麻麻同佢兩個人做乜好呢？真係考起．我識去既地方都同佢去勻啦，諗黎諗去都唔知跟住去邊度，最後都係決定同佢遊車河．常言道名車美人，美人己有，架車梗係唔可以失禮，我物色左架過百萬港元，普通人有錢都冇可能買到既名車載佢，而且重有專業司機接送添，呢架名驅就係之前提過既......２３號巴士勒，哈哈哈．

O係車度， Melody 係咁講佢讀書時o的趣事我聽，佢話以前學生妹時成日扎馬尾，佢O的同學就周不時整蠱佢，趁阿 SIR 行過佢隔離時嗌佢，等佢擰頭發起條辮辦中阿蛇......同佢講講下，車到蒲飛路總站，唯有落車，見佢意猶未盡，只好繼續陪佢行．因為我屋企就o係附近，我就好自然帶佢往家裡方向走．行到我屋企樓下，我話：我行到有o的累，我想上去坐陣抖抖．諗住 Melody 聽到會乖乖地自動返歸，點知佢好似的忠實 Fan 屎咁係都唔放過我，同我講：好呀，我都想坐下．咁我又再一次帶佢返屋企.

上到去，入房，攞野飲畀佢，坐低，傾計．傾傾下，歷史又再重複，突然間我同佢靜晒，你眼望我眼，老土既劇情好似又要發生勒，但係有左上次既經驗，呢次我有翻O的理智，懸崖立馬咁同佢講：我應承過你既野一定會做既......但係講完左，佢重係脈脈咁望住我，唔好咁呀，我雖然有需要時係可以好冷靜，好理智，但係我始終係都係一個人，唔係電腦，我身體裡面除左０同１外，都重有感情既成份既，我......我......我卒之又同佢......     再次失守畀佢後，佢自疚咁話：我唔知自己做緊乜......覺得好對我男友唔住......　　　我一聽火都黎埋，忿忿不平，同佢講：咁你男友又好對得你住囉喎？　　Melody 無言低頭，我只好講：算啦，唔講呢o的勒，我送你撘車啦．

第二日，我 Burn 左張 Audio CD 畀 Melody ，落左幾首心水歌當點畀佢聽，尤其有一首 Print 埋歌詞叫佢留意，希望佢早日從呢個惡夢中瞓醒過黎啦．



夢醒時分(迪克牛仔版)

曲：李宗盛 | 詞：李宗盛 | 編：迪克牛仔

你說　你愛了不該愛的人
你的心中滿是傷痕
你說你犯了不該犯的錯
心中滿是悔恨

你說你盡了生活的苦
找不到可以相信的人
你說你感到萬分沮喪
甚至開始懷疑人生

早知道傷心總是難免的
你又何苦一往情深
因為愛情總是難捨難分
何必在意那一點點溫存

要知道傷心總是難免的
在每一個夢醒時分
有些事情你現在不必問
有些人你永遠不必等

[ Last edited by attaboy on 2005-10-20 at 09:47 PM ]

attaboy

......續前

跟住個星期六，因為前一日做緊個 urgent project，晨早起身返工司去做埋佢．途中， Melody 又 called 我，問我喺邊度，我話返緊公司，佢話佢又返．當時我都唔 sense 到有咩唔妥，以為佢咁啱手頭有嘢未做完想搵人陪約埋一齊返，都冇去深究．返到公司，得我一個人，埋位做嘢．過冇耐，Melody 返到，各自各做嘢．過咗陣， Melody 走埋嚟，冇啦啦掃冧晒我枱面既嘢，我開始有不祥預感，因為 Melody 平時係超級斯文既，極唔高興都只會係唔出聲，從冇見過佢咁失常，做啲咁失禮既行為．

問佢又咩事，佢嗚呼哀哉回答：我男朋友話要自殺呀！　　　　吓，又嚟呀？我登時好懷疑阿神其實係女人嚟，因為呢啲一兇二罵三要死我平時絕對只會係喺女人身上先見識到既啫．當下安慰 Melody 話：冇事既，佢講下啫，唔會真係要去死既．　　　Melody 則話：但係我好擔心呀，怕佢真係有咩事呀！　　我話駛咩擔心吖，一個人如果真係立心要死，係唔會同人透露既．同得你講，只不過係你博同情，博你閞心啫．

順帶一提，阿神其實係同我同屆，同年考 Cert 既，我有個羅記舊書友係佢大學同學．阿神喺學界係頂班人馬，年年做船主．所以我覺得阿神只不過自尊心作崇，接受唔到被人飛，出埋啲女人手段博 Melody 回頭．

見 Melody 個樣都好似唔係好放心，我話：不如你坐住喺雷蒙個位先，我要搞埋個 Proj. 先再你講．　Melody 都唔想阻我做嘢，自己坐埋雷蒙位繼續飲泣．

當我做做下嘢時，公司個 Proj. Manager 彭美拉返到，問我做好未．我話差唔多啦，重爭少少就得．呢個時候，彭美拉個樣開始有異，側側身行過雷蒙位望一望，然後好尷尬咁講：我一陣先再過嚟搵你．　　唉，唔駛問，整喊 Melody 呢隻死貓大餐又係無料奉送咗畀我．但係解釋最無謂，問心無愧係最實際．立即趕快完成埋手頭既嘢，交咗 deliveries 畀彭美拉.

返去睇下 Melody　，重喊緊，我同佢講：如果你真係擔心既話，我陪你去睇下阿神啦．不過我寫包單，佢係死唔去既，如果個天咁有眼，佢死得去，我無條件同佢墊屍底！

attaboy

Originally posted by siredes at 2005-10-28 11:50 AM:
請恕我直言, 我覺得Melody同佢男友兩個, 都係有D神經質...
雖然你為人火爆, 但起碼你D行為係正常, 唔似佢兩個咁樣...

佢兩個本來真係天造地設既一對，金童玉女，男既大把女人投懷送抱，女既永遠一班男人拜倒其下．加上佢地愛恨交煎，神經俠侶捨佢地其誰？

我其實一路都覺得自己好正常，只不過其他人覺得我係癲既之麻．但我唔 care 佢地點睇，I will always be the change I want to see in this world.

不過都好多謝你，搵到覺得我係正常既朋友係我喺呢個世界既生趣嚟 ;> good to know you, siredes!

P.S. 上文「嗚呼哀哉」係「嗚咽」之誤．

[ Last edited by attaboy on 2005-10-28 at 12:13 PM ]

attaboy

最近本人真的忙個不可開交，欲知後事如何的朋友，最快都要等到下個月初，本人有空抖一抖之時才可再述下回分解．

attaboy

......續前

淚眼盈盈的 Melody 搖搖頭，都唔知係信阿神死唔去定係我可以死去．佢呆左陣後話：我想返埋位同佢繼續 ICQ．我只好陪佢行埋位，立下個芒，dialogue box 已佈滿o的常用o既鬧人英文字句，不過黎黎去去都係o個四五隻英文字母，都係鬧 Melody 冇 reply 佢．阿神枉為學界精英，連小小罵人的藝術都唔識，高手鬧人係不可帶髒字o架．見 Melody 木無表情，只係好專心繼續佢既 ICQing．過左陣，Melody 手機响，聽佢傾左幾句，知係阿神打黎，但係 Melody 依然用另外隻手 ICQing．我愰然明白 ICQ Phone 係點解要發明勒，原來有人係鍾意咁樣 communicate 法既．再過左陣， Melody 突然大嗌：我唔講啦！　我見到有粒淚珠沿佢面龐悵然而下．然後見佢伏係檯頭不停飲泣．問佢乜事？　佢將阿神一o的好無賴好卑鄙o既說話覆述我聽．我登時無名火又三千丈，要威脅個女仔唔分手都唔駛咁下三流呱？　但係 Melody 話好擔心阿神真係做出o個o的卑鄙行逕，問我點算，我同佢講話：有乜點算，見招拆招，等佢做出先至算！同埋做人如果問心無愧就乜都唔駛擔心．自己冇對人唔住已經好夠，人地係都要對你唔住，真係天要下雨，控制唔到個喎．不過你放心，有我係度，佢o的低莊招係無用武之地既，我係專對付呢o的所謂叻仔o既人． Meldoy 聽完安心o的，同我講：阿神而家過緊黎公司搵我，但係我唔想見佢呀！　噢！女人！你的名字是善變，十分鐘前話要去搵佢，十分鐘後連見都唔想見佢．不過無所謂啦，我都開始習慣佢地呢o的反覆無常o既特性，同 Melody 講：咁我地而家走，去食晏好冇？　Melody 破涕為笑道：o依！而家咁肉酸，落街好樣衺（指剛喊完）！  Oops！差o的唔記得o的靚仔靚女係最緊張個樣添，好在我不嬲都冇呢個顧慮，亦都多謝阿媽冇畀呢個包袱我．　等 Melody 去完洗手間，佢好似洗左個面，話行得啦．咁同佢兩個人落樓下 Food Court 食快餐．食完野，佢問我跟住去邊好？吓！即係又要我諗節目，唯有又度下．因為女仔係天生o既 Shopper，佢地做人就好似去行街買衫咁，見到有野吸引佢地既鋪頭就死都唔肯走，不過一但間 shop 無新貨式返 ，佢地就毫不猶疑行左去第二間．諗下諗，冇乜 idea，我識做既棟篤笑都已經做勻畀佢睇，唯有提議上我屋企睇黃老華既正牌棟篤笑啦．

[ Last edited by attaboy on 2005-12-30 at 02:35 PM ]

attaboy

Originally posted by sky2005 at 2005-12-31 12:39 PM:
唉..唔會又>3<?

冇．之後亦都再冇．

attaboy

......續前

上到屋企，放左 VCD 畀 Melody睇．由於當時只係一心唔想畀阿神o的奸計得逞，但係又怕自己會同 Melody 再生枝節，只好打畀施莉亞，話畀佢知 Melody 既情況，問佢得唔得閒，可唔可以出黎幫我陪陪 Melody，施莉亞話有野做緊，最快要到夜晚先得．我話咁唯有一齊食晚飯．施莉亞有o的唔放心，千叮萬囑我同 Melody 淨係睇 VCD 好啦，千祈咪諗其他野．我同佢講話：知啦．你估我真係o的姑爺仔大狼狗，專吼o的失戀少女黎埋手咩？

陪住 Melody 睇 VCD，間唔中望下佢，見佢雖然都有笑，但係眼裡依然有一點點哀愁，知佢重未忘懷o的唔開心既事．好平靜睇到六點，同佢撘車落灣仔會合施莉亞同肯尼士．呢次係佢地三個第一次見面，我地去左一間小菜館食中菜．席間，我地四個都若無其事，談天說地．講下笑話，食完飯，一行人再去 CWB 大時代廣場樓上飲野．我趁 Melody 去洗手間之際，同施莉亞及肯尼士講左阿神o個番無恥說話．施莉亞即時好大反應咁話：乜呢個世界原來有o的男人可以做到咁賤格？　我就話：咁你而家知我點解要陪住佢啦！我係最不能容忍呢o的影衰男人既行逕既．

坐到十點幾，Melody 話怕屋企人擔心，想打個電話報到．佢開翻個手提（臨離公司前佢熄左），行左出門口傾．返黎佢同我講話要走啦．我話送佢，佢話唔好．因為阿神岩岩打左電話畀佢，話下晝去公司搵唔到佢，就去左佢屋企樓下等佢，等左六個鐘，一路重等緊，話一定要見到佢為止．我明白如果畀亞神見到我，只會令事情更複雜，所以都冇堅持要陪 Melody 返屋企，同佢講：我諗你都知道應該點 handle，自己小心啦，有事就打畀我！　　Melody 點點頭，語帶堅定話：我會同佢講清楚架勒！　我應以微笑，再送個眼神嘉許．過冇耐，我同肯尼士等都埋單各自返歸．

第二晚，Melody 打電話畀我，好開心咁話我知同阿神已經講好左分手，呢次應該係真個喎．我話：咁咪好羅，瞓返個好覺啦．人生裏面除左情情塌塌外，重有好多更有意義既野可以做架！唔好花晒o的精神時間落呢瓣野度．　Melody 應話知道．事情表面上好似真係告一段落，我亦完左一件心事，安心承大成至聖先師孔老二遺訓，去夢見周公矣！

[ Last edited by attaboy on 2005-12-31 at 07:17 PM ]

attaboy

Originally posted by 道友 at 2005-12-31 11:25 PM:
我無睇到你既上集,, 所以都唔知道你既...
你同好多你公司既同事都死起佢既手上... 係咩意思

我都唔知佢到底算係乜人，男既通常覺得佢係天使，女既大部份卻認為佢係魔鬼......連佢自己都曾經向我直認不諱．

至於何謂死係佢手上？當然唔係以醫學角度而言，我參考了香港法律既觀點，得出以下定義：

在愛情謀殺罪上，控方必須証明疑犯在謀殺受害人的心時，是存有意圖致他的心於死地或導致他愛情重創。但即使沒有意圖成份，疑犯在行兇之前，旁人如果認為她早應「預見」受害人的心有可能會傷重或死亡，疑犯亦有可能被判愛情謀殺罪名成立。

Melody 通常犯的是謀殺而非誤殺．