coolala2005

copy from orisun.com  20/11/2005

堅尼離開曼聯引起哄動，盛傳係同費格遜嗌大交後被炒，並非表面所講協議解約，前隊友碧咸深表震驚之餘坦言感觸良多，碧咸暗示堅尼突然離隊，與自己當年命運相似，同樣係費爵爺權威之下犧牲品。
       

碧咸感嘆命途相似
       
據英國傳媒爆料，協議解約只係做戲，實情係費格遜同堅尼嗌大交，決定解僱呢位老大哥。○三年由曼聯轉投皇家馬德里碧咸，盛傳亦係被費格遜逼走，佢表示從來冇諗過堅尼會離隊：「我原本以為堅尼會曼聯踢多幾年，之後再轉型波，佢離開實在太突然，但正如兩年前我離開曼聯一樣，當時連我自己都覺得好意外，作為足球員，你永遠唔知將來會發生乜事！」

碧咸認為堅尼地位無可代替：「堅尼場上影響力極大，佢係真正領袖，得到隊友同對手尊敬，佢離開曼聯後，我認為加利尼維利係隊長合適人選。」

英國《鏡報》調查顯示，有近32%網民認為拜仁中場波歷克係堅尼最佳代替人選，第二位係祖雲達斯韋拉，得票率亦高達29%。