attaboy

Originally posted by sky2005 at 2005-12-31 12:39 PM:
唉..唔會又>3<?

冇．之後亦都再冇．

attaboy

......續前

上到屋企，放左 VCD 畀 Melody睇．由於當時只係一心唔想畀阿神o的奸計得逞，但係又怕自己會同 Melody 再生枝節，只好打畀施莉亞，話畀佢知 Melody 既情況，問佢得唔得閒，可唔可以出黎幫我陪陪 Melody，施莉亞話有野做緊，最快要到夜晚先得．我話咁唯有一齊食晚飯．施莉亞有o的唔放心，千叮萬囑我同 Melody 淨係睇 VCD 好啦，千祈咪諗其他野．我同佢講話：知啦．你估我真係o的姑爺仔大狼狗，專吼o的失戀少女黎埋手咩？

陪住 Melody 睇 VCD，間唔中望下佢，見佢雖然都有笑，但係眼裡依然有一點點哀愁，知佢重未忘懷o的唔開心既事．好平靜睇到六點，同佢撘車落灣仔會合施莉亞同肯尼士．呢次係佢地三個第一次見面，我地去左一間小菜館食中菜．席間，我地四個都若無其事，談天說地．講下笑話，食完飯，一行人再去 CWB 大時代廣場樓上飲野．我趁 Melody 去洗手間之際，同施莉亞及肯尼士講左阿神o個番無恥說話．施莉亞即時好大反應咁話：乜呢個世界原來有o的男人可以做到咁賤格？　我就話：咁你而家知我點解要陪住佢啦！我係最不能容忍呢o的影衰男人既行逕既．

坐到十點幾，Melody 話怕屋企人擔心，想打個電話報到．佢開翻個手提（臨離公司前佢熄左），行左出門口傾．返黎佢同我講話要走啦．我話送佢，佢話唔好．因為阿神岩岩打左電話畀佢，話下晝去公司搵唔到佢，就去左佢屋企樓下等佢，等左六個鐘，一路重等緊，話一定要見到佢為止．我明白如果畀亞神見到我，只會令事情更複雜，所以都冇堅持要陪 Melody 返屋企，同佢講：我諗你都知道應該點 handle，自己小心啦，有事就打畀我！　　Melody 點點頭，語帶堅定話：我會同佢講清楚架勒！　我應以微笑，再送個眼神嘉許．過冇耐，我同肯尼士等都埋單各自返歸．

第二晚，Melody 打電話畀我，好開心咁話我知同阿神已經講好左分手，呢次應該係真個喎．我話：咁咪好羅，瞓返個好覺啦．人生裏面除左情情塌塌外，重有好多更有意義既野可以做架！唔好花晒o的精神時間落呢瓣野度．　Melody 應話知道．事情表面上好似真係告一段落，我亦完左一件心事，安心承大成至聖先師孔老二遺訓，去夢見周公矣！

[ Last edited by attaboy on 2005-12-31 at 07:17 PM ]

道友

我無睇到你既上集,, 所以都唔知道你既經歷
頭頭我睇到你講左句 你同好多你公司既同事都死起佢既手上... 係咩意思
係咪佢一直玩緊你,, 定係佢..... 我一路睇落去都想知道係咩意思 佢真係咁西利?
真係睇到我好想再睇落去 好想知 佢係個咩人 都好想睇你之前個一集
希望你快d可以再寫下去 佢係咩人呢....

attaboy

Originally posted by 道友 at 2005-12-31 11:25 PM:
我無睇到你既上集,, 所以都唔知道你既...
你同好多你公司既同事都死起佢既手上... 係咩意思

我都唔知佢到底算係乜人，男既通常覺得佢係天使，女既大部份卻認為佢係魔鬼......連佢自己都曾經向我直認不諱．

至於何謂死係佢手上？當然唔係以醫學角度而言，我參考了香港法律既觀點，得出以下定義：

在愛情謀殺罪上，控方必須証明疑犯在謀殺受害人的心時，是存有意圖致他的心於死地或導致他愛情重創。但即使沒有意圖成份，疑犯在行兇之前，旁人如果認為她早應「預見」受害人的心有可能會傷重或死亡，疑犯亦有可能被判愛情謀殺罪名成立。

Melody 通常犯的是謀殺而非誤殺．

Elsie

好期待!! =)

homan~

Originally posted by attaboy at 2006-1-1 10:59 AM:


我都唔知佢到底算係乜人，男既通...

bro~

新年快樂!!!!!



你依輪點呀???

聽你咁講, 佢好似係果d 要有人追, so証明自己既人wor

佢咁又何必呢 ?

attaboy

Originally posted by homan~ at 2006-1-2 04:25 AM:
bro~
新年快樂!!!!!

你依輪點呀???
聽你咁講, 佢好似係果d 要有人追, so証明自己既人wor
佢咁又何必呢 ?

homan, happy new year!　多謝你一直以黎都咁捧塲！

最近真的很忙．本來打算返黎 OZ 過的樂 Com(puters) 書以消憂的生活，奈何個天同我過唔去，失驚無神要我 run 多辦生意，所以黎緊三五年都可能要繼續o的營營役役既生活．不過唔緊要，因為而家我可以學我既 No. 1 hero 講 "I can certainly define happiness, because happy is what I am!"  當我第一次讀到佢呢句說話時，真係覺得做人去到呢個境界先至不枉此生．同埋，而家我 "don't have to associate with anybody who causes my stomach to churn." 呢點在我黎講係至為重要既．

Melody 大至上都係你所講既咁，好多女仔都有呢個問題．我都不下一次質問過佢，佢自己死話覺得唔係喎（但我諗佢係唔願承認啫）．點都好，o係 Melody 身上我見識齊女仔既弱點同通病，佢幫我上左一課女性心理學既 advanced course. 回頭睇返，我應該感激佢多過責怪佢既．

[ Last edited by attaboy on 2006-1-3 at 09:27 AM ]

homan~

Originally posted by attaboy at 2006-1-3 07:14 AM:


homan, happy new year!　多謝你...

bro

捧你埸應該既,
小既都係度偷師ma

依輪我幾忙下
如果唔係一定好似bro 咁
租碟煲下棟篤笑先

MRSLEE

一次過睇哂你的愛情故事... 感覺良好~~
Melody係一個懂得"耍手段" 的女孩噢~~
attaboy兄...期待你的故事呀~~

siredes

attaboy~我仲等緊你繼續講o架~